14. R.L. KAMLALA LEH A HLATE R.L. Thanmawia

33.    ROKUNGA  LEH  A  HLATE                                            

                    B.Lalthangliana                                           

ROKUNGA hian tuna kan hriat theih chinah chuan hla 126 a phuah a. Chung zinga hla 97 chu, a damlaia amah ngeiin a buatsaih hnuhnung ber Thalaite Hlabu, 1962 (chhut 3-na) ah khan a seng lut hman a. A hla dang 3 chu Thalaite Hla bu, 1989 (chhut 4-na) ah khan dah luh thar leh a ni a. Hlapui a phuah chhun, “Aw jaa, aw jaa” chu Hlapui bu, 1976 ah khan telh a ni a. Tichuan a hla phuah 101 te chu mipui sak theiha pholan a ni tawh a. A hla phuah dang 25 te erawh chu a kutziak hla buah khaw eng hmu lovin a la muhil rih ani.

Ama kutziak hlabu-a a landan in, kum 1942 atang khan Thalaite Hlabu hi buatsaih tumin a bei tan a. Chu a kutziak hlabu vei lamah chuan, a hla phuah zawng zawng deuh thaw chu Tonic solfa a ziak a, a ding lamah hla thu a dah thung a. A kutziak a mawiin a fel that mai a ni. A kutziak hlabu 1-naa chuang hla 9 te leh a kutziak hlabu 2-naa hla 16 te chuan khaw eng la hmu rih lo mah se, tun tuma Rokunga hlate kan zirnaah hi chuan kan telh dawn a ni.       

Rokunga hlate hian sak a hlawh chang a ni lo va, zir leh ziak pawh a hlawh hle a, thuziak hrang hranga tarlan pawh a hlawh hle mai. Amaherawhchu a hla zawng zawng thlir a chhui leh ziak erawh chu a la awm meuh lo va. Tun tumah hian a hla pumpui huapin, kimchang deuh hlekin, kan phak tawka thlur kan tum dawn a ni.      

A chanchin tlangpui sawi hmasa hlek ila. A pa Thangluta hi Khuaihnuai (Sialsuk kiang)-ah leh Sawleng khuaah te a lo khawsa tawh thin a, a nu chu Zaliani a ni. Aizawl venghnuaiah an pem lut a. A nu leh pa hian fa an dam theilo hle a, hlamzuihin an thi thin a, an beidawng rum rum a ni awm e. Kum 1914 February ni 20-ah fapa duhawm tak an han hring leh a, an lawm em em mai a. An kawmthlang pitar chuan, “Hei hi zawng fa ro tur, nu leh pa chawmtu tur a nih hi,” tiin a hmingah ROKUNGA a sa a, a pu hlen ta a ni. He pitar hian a ti dik hle a ni, nu leh pa chawmtu, fa ro chauh a ni lova, Mizo hnam tana ro tling a lo ni ta hial.                                     

A naupan lai aṭangin mi zakzum leh nunnem a ni a, ngilnei leh lainatna ngah tak a ni. Zai leh rimawi leh tumrik lam  a ngaina hma hle. Inhlawhfa chawpin lehkha a zir tauh tauh a, lo lam hna a thawk kawp bawk a. Tichuan, Aizawl Sikulpui atangin Lower Primary 1927 khan a zo va, 1929-ah Middle a passed leh bawk. Kum 1934 January ni 2 atangin Loch Printing Press (tuna Synod Press) –ah a thawk tan a, a damchhungin a thawk a ni.   

Pastor Chhuahkhama kutah Zamawii nen 1935 April ni 9-ah an innei a, fanau malsawmna an dawng hle. Kum 1940-ah Mission Veng ah an insawn a, 1945 khan Kohhran Upa-a thlan a ni. Amah hi pa tê lam, ft 5 leh inches 3 hmel fel tak a ni. C.Vanlallawma chuan Rokunga hi , “……. Kristian hmel pu thlap … Mizo nihnaa lungawi em em, siamthat duh si a ni. Mi nunnem leh zaidam a ni a, a rilru a ropui bawk….” Tiin a ziak.

Kum 1966 February thla khan Durtlang damdawiinah an zai a. Rambuaiin a nan zui avangin Lungleiah an ral tlan ve a, April ni 8-ah Bilkhawthlir-ah an insuan leh, thla thum lai an khawsa a ni. Aizawl an luh hnu chuan Press hnaah bawk chuan a bur leh nghal a, 1969 July Ni 9 atangin a nuamlo tan a, ni 12 tlai lamah chuan nikhaw hrelo khawpin a na zual a, ni 12 July 1969 zan dar 10:15-ah chuan, Zofate tana Pathian thilthlawnpek, kan lei arsi lian tling Rokunga chu van arsi te anga eng zui zel turin a tawlh liam ta a ni.         

Rokunga kutziak hla bua kan hmuh danin, kum 1939-a a phuah, “Van hnuai khuavel sakhming chhiarin” tih hla hi a hmasa ber a, “Sualin bo mah ila” tih hla, ni 7 May 1969-a a phuah chu a kutchhuak hnuhnung ber a ni ta. Tichuan kum 30 chhungin hla 126 a phuah hman a, van ropuina ha tura a tawlh liam hma, ni 67 thleng khan hla a phuah tih kan hmu a ni.                                                                    

Rokunga hla 126 te hi hlawm nga a then theih a ni a. Hetiang deuh hian lo chhep hrang ila :

(a)  Krismas Hla                                - 20

(b) Kristian Hla                                - 35

(Hengte hi chi khata khung theih a ni na a, zir a awlsam zawk nan kan han thenhrang lui a ni)

(c)  Khuarel (nature) hla                 - 22

(d) Hla chi hrang hrang                  - 35

(e)  Ram leh hnam hla                     - 14

Rokunga hlate a lo chhuah dawn hnaih leh, a hmâ deuh fea hla lama Mizote boruak hi a ngaihawm hle a, tlem lo en ila.Kum 400 emaw lai kan pi leh pu te chu anmahni hlain an lo inawi lungleng ve tawh a. Kum 1894-a Missionary ten Kristian sakhua an rawn put luh khan, Zofate benga la ri ngai reng reng lo hla an rawn tawlh lut nghal a. Kristianna chuan Zoram a tuam zel a, hla pawh an letling tam hman hle. Hla 18 chauh chuang Kristian Hlabu hmasa ber 1899-ah a chhuak na a, chhut vawi 8-na 1919-ah chuan hla 558 a chuang tawh. Chung hlate chuan Zoram dung leh vang a chiah hneh tan hle a ni.          

Harhna tum 3-na kum 1919-a lo thleng khan, Mizote tan ro hlu tling Mizo ir-awm chhuak Kristian hla thar a rawn vawrh chhuak a. Patea te, R.L. Kamlala te, C.Z. Huala te leh Mizo hla phuah thiam ropui tak tak an lo chhuak ta a. An hlate chuan Zoram dung leh vang a deng chhuak thuai a, mipuiin an duhin an tuipui em em.    

Mihring zia leh nunphung hi mak angreng tak a ni. Nulat tlangval lai, hun mawi leh nuam, hun rangkachak hi amah ngawt chuan a tlei thei lo va, an inkar thu, induh tawnna leh inngaihzawnna leng vel chu tawngkâa sawi ngawtin an lung a dum lova, an tuihalna a reh hek lova, an lunglenna a chhâwk zang hek lo. Hlaa hril a ngai a, puanchhuah a tul a, lungleng taka sak loh theih a nilo. Chu chu Kristian hla ngawt chuan a thawidam zo si lo.              

Chuvangin kum 1915-17 velah khan “Kaihlek hla” a lo chhuak tan a, “Lengzem hla” in a zui nghal deuh mai bawk a. Kum 1930-45 velah phei chuan a lar hle a, chung zinga thawh hlawk ber chu Lunglei tlangval Lalzova a ni tih kan hre theuh awm e. Nula leh tlangvalte chuan an tuipui em em a. Mizoram hi thangbuan hal ang maiin a tuam chhuak zung zung mai a ni.                                                                                           

Amaherawhchu Kohhran in a do nasa a, Kaihlek hla Kohhran Upa hriata sa phei chu khaw thenkhat ah phei chuan dan pawnah an paihchhuak thin. Kum 400 emaw lai an lo inawih lunglen ve tawhna Mizo pipu zai sak an khap tlat bawk si. Kristian hla ngawt chuan an nun tuihalna chu a châwm zo bawk si lo. Heng hunlaia nula leh tlangvalte thawipik turzia hi thangtharte chuan kan hre thiam pha lo hial ang.    

Vanneihthlak takin Thalaite tana khawdur vai kiang turin Rokunga te, Vankham te, Liandala te leh mi dang engemaw zatin hla pawi sawi lo, tuma mitmei ven ngailo leh, tu bulah pawh inthlahrung hauh lova sak chi ram awih hla te, hnam chungchang phuahna hla te leh hla chi hrang hrang an rawn phuah ta ur ur mai a. Zofate tan, a bik takin thalaite tan malsawmna a tling kan ti thei hial ang.            

Chung zingah chuan Rokunga (1914-1969) hian a thawh hlawk ber ti ila, kan uar a ni kher lovang. Tin, Thalai Hlabu 1952, 1956, 1962, leh 1989 a chhut nawn fo tlak a buatsaih hian a buk a ti rit zual a. Prof. Siamkiman, “Rokunga hi Mizo thalaite hla sak tur petu, mi malah chuan amah tluka thalaite lungrual tak leh hlim taka zai tir theitu hi kan hla phuahtute zingah hian an awm lovang,” a ti a, a pawmawm hle. (Zalenna Ram, 1986).

YMA hla bu 1979-ah khan hla 205 a chuang a, Rokunga hla 40 thun a ni a; 1989-ah hla 163 telh a ni a, Rokunga hla 50 a chuang a, 1993-ah hla 106 a khung a ni a, Rokunga hla 32 a tel bawk. Mimalah chuan Rokunga hla a chuang tam ber tluan chhuak zak a. Tin, Thalai Hlabu vawi 4 leh YMA Hlabu vawi 3 chhut tawhah hian Rokunga phuah, “Aw nang kan Lal kan Pathian” tih hian No 1-na a luah ngar ngar bawk. Hengte hian Rokunga hla thalaiten an sak tam a, an ngaihsanzia a tilang chiang hle. Chuvangin YMA Diamond Jubili, 1995-a an chawimawi kha a inhmeh hle a, a phu hliah hliah reng a ni.

Krismas Hlate : A hmasa berin, Krismas hla a phuahte hi lo en ila.

Mizo hla phuahtute zinga kutchhuak ngah deuh pakhat, hla 55 lai phuahtu Patea (1894-1950) chuan Krismas hla panga a phuah a, a thawh hlawk pawl niin a lang a. Rokunga (1914- 1969) erawh chuan Krismas hla thiau 20 lai a phuah a, chung zinga hla 18 chu Thalaite Hlabu (1962, 3^rd Edition)-ah a chuang a, a dang pakhat ve ve chu a kutziak Bu 1-na leh Bu 2-naah kan hmu thung. Tichuan Mizo hla phuahtute zingah Rokunga hian Krismas hla a phuah tam ber e ti ila, kan tisual kher lo vang.                       

            Krismas hla a phuah zinga, “Kumpui sul a lo vei chang hian” hla hi ngun deuha kan en chuan, Kristian hla pangngai a hawl pha lo lek lekin a hriat theih a, ‘Krismas’ tih vawi hnih leh ‘Bethlehem’ tih tum 1 a tel hian tlem chuan Krismas rim a ti nam deuh a tih theih a. Amaherawhchu hun duhawm lo thleng tur thlira boruak a han zap nung thar leh, hun pui hlimawm tak rawn inher chhuak leh tur a puangzar thar leh hrim hrim hi iaiawm lo tak, hlutna riau pai a tling ve tho mai.             

            Kan hla phuahtute hian Isua pianna “Bawng In” niin an sawi deuh zel a. Rokunga pawh hian a Krismas hla 20-ah hian vawi 11 lai ‘Bawng In’ tih a hmang a. A hla pakhata chang khat ah phei chuan tum hnih lai kan hmu a ni.                                   

            Pi leh Pu atanga Kut chi thum lai lo nei ve, uar leh hlim taka lo hmang thin Zofate hian, Kristian kan nih hnu chuan kan hnawl ta vek a. Tunah chuan Krismas chauh kan nei ta a. Chuvangin uar lo thei kan ni lova, âm lo thei kan ni hek lo. Hnam dang Kristianten an chin ve ngai reng reng loh, an rilru pawha an suangtuah ve ngai hek loh, Krismas urlawk zana tlaivar ngei kan lo tum thin te kha a mak lova, indem lutuk tur niin a lang hek lo. Chawngchen, Sechhun leh Khuangchawi urlawk zan, ‘Thingfâr zan’ an lo tihah khan, nula leh tlangval chu tlaivar ngei ngei tur a ni a, a tlaivar lo chu a tukah an tel thiang lo rilru kha Kristian kan nih hnu thleng hian kan hnamah a bei zel a, kan rilruah a bet tlat a, kan hriat loh hlan hian chu Mizo Culture chuan min la influence zel a ni ti ila, a sual awm lo ve.        

            Chutiang khawpa Zofaten kan ngaih pawimawh leh, a thlen hun kan nghahhleh em em, Tlumtea thlir taka kan lo thlir thin, uar deuh taka kan hman, insenso thui taka kan huam thinna Krismas chu hlim tak leh lawm taka kan hman theihnan hmanraw pawimawh ber pakhat Krismas hla tha tak tak Rokunga hian thahnem tak Zofate min pe a, Mizo hla phuahtute zingah a thawh hlawk lawr lak lehnghal a. A phuah tam ngawt a ni lo, a Krismas hlate chu thalaiten an ngaina a, an duh a, an tuiin an hlimpui em em hi chhuanawm tak a ni. A hlate hian Krismas a ti ropui a, a tihlu zual a tih theih hial bawk.          

            Krismas a lo thlen apiangin Tlaizawng a lo par a, Tlangsam (pholeng) a lo vul thar leh ang hian, kan Krismas hlate pawh hi a lo vul thar leh thin a. Chung zingah chuan Rokunga hlate hi a par mawi pawl tak leh a langsar ber te zinga mi, duhawm taka vul thin leh buk tha ber te zinga mi kan ti thei hial awm e. Tlaizawng leh Tlangsam te an chuai thin ang bawk hian, Kan Krismas hlate hi chuai ve thin mahse, a hun te ah a lo par thar leh zel a, ze thar an chhuah leh thin ang bawk hian, kan Krismas hla te hi a lo vul thar leh a, rilru leh ngaihtuahna a ti hlim a, a ti thar a, nun a ti thar sar leh thinte hi malsawmna ropui tak a tling.

Kristian hlate : Kristian hla a phuahte lo en leh ila. Rokunga hian Kristian hla 35 lai a phuah zinga a tam ber chu Thalaite Hlabu ah hian seng luh tawh a ni. Mak ang reng tak chu, a hla chi dangte ang lo deuhin, Kristian hla a phuah tlem azawngah chuan Mizo tawng khap sual zauh chang a nei hi a ni.

            Rokunga Kristian hlate hi, a hla chi dangte ang lo deuh hlekin, sawi chhuah dan thar emaw, tawngkam danglam bik, ngaihnobei riau emaw, suangtuahna leh ngaihtuahna thar lama puan chhuah a nei meuh lo va. Mizo Kristian hla thar pangngai tak a ni a tih theih awm e. Kawng danga sawi chuan, Kristian hla lamah chuan Rokunga hian midang a khum hran lova, a hla chi dangte angin mi chuang lem lo ti ila, a sual awm lo ve. Amaherawhchu a hla zepui angzelin. A Kristian hla phuahte hi a tluang a, sak a nuam a, hriat a awl bawk a, mite sak duh pawl tlak a tling tho a ni.

            Khuarel hla lama kan hmuh chian tak pakhat chu, sak nuam tak leh ngaihnawm taka Mizoram mawizia a puang hi a ni a.

                        Aw ka pianna ka seilenna ram nuam                                                                              I awmna piallei Zo hmun sangah:                                                                                   Thing zar mawi leh Pangpar vulna ram nuam,                                                            Ram zawn laiah I mawi chuang e.,

a han ti te hian, hmun kilkhawr leh tlangram chhengchhe tak, ruam thuk tak awmna ram ni mah se min ti lungawi  a, phaizawl kan awt chuang lova, mi ram kan ngai bik hek lo, ram dang zawng zawng aia duhawm zawk hial angin min hmuhtir thei a ni.

            A dang lehah chuan Rokunga hlaa fiah taka kan hmuh chu Zofate zinga a tam berin nitin hnaa kan neih ‘Kut hnathawh’ zahpui lo tur mai ni lova, ngaisang thei turin thalaite a kawhhmuh a, a zirtit a, an rilru a chawk tho hi a ni leh a. Kum zabi 20-na ah kan tawlh lut a, zirna lamah ke kan pen tan a, a then sipaiah kan lut a, thingtlangah zirtirtu an awm fir fer a, Pastorin bial an thut bawk a, Rahsiin bial an fang a, an intilal hle a, ‘Ni leh thla kara leng’ an lo tih hial thin Lalte pawh an zah meuh lo va, an report ang angin an chungah Bawrhsapin kut an thlak thei tih an hre ran a, lal an nêk a, zu hmunah an inluling a. Chutiang chuan thla tina hlawh la ‘Kamding’ chu miten an ngaisang a, nulate  lahin an pâk nasa. A leh lamah thung chuan ni tina an thawh mek, thawk lo theilo dinhmuna ding siin kut hnathawh kan ngainep tan a, kan hmusit titih tan ta mai a.                                                                 

            Hetih tak mai hian Rokunga hian Zofate tana pawimawh chu a hmuh hmaih hauh lova, mahni ni tin hna leh kut hnathawh ngainep leh hmusit lek lek tawha ngui nghiai nula leh tlangvalte chu, hah taka ram kal, khiang hlim vawt riai hnuaiah an chawl a, zo thlifim lo thaw heuh heuhin an thlan sa a chhem dai hiai hiai ang maiin, a rawn chhem dam ta siai siai ni berin a lang.                                                                       

            Engtik emaw lai atang tawh khan kan ‘Mizo’ nihna emaw, ‘Zo nun’ hrim hrim emaw thleng khan, kan hnualsuat lek lek tawh a. ‘A Mizo em mai’ tih te pawh, ‘A mawl em mai’ tihna emaw, ‘A changkang lo em mai’ tihna emaw tiin kan hre lek lek a, a awmziaah kan ngai ta mai emaw tih tur a ni. Dr. R.L. Thanmawian, “Tualthah kawr kan pawtthler a, khawl tah kan chawi a; vaibel dawn kan seh keh a, lehkhazial kan pet kawh a, thlanvawng thleng kan khaikhup a, darthlengah chawhlui kan kil a ….” A lo ti hi  a pawmawm khawp mai.                 

            Rokunga hian Zo nun hi a ngaisang a, a ngaihlu a. Mizo nih hrim hrim hi a dah sang hle mai. Chu chu Mizo hnah thlak zawng zawng zingah eng ang khawpin nge a fawn zau va, a fawk thlen tih hi tuman kan teh chhuak seng awm lo ve.

Hla chi hrang hrang :

Rokungan hla chi hrang hrang a phuah te hi lo bih leh ila. Chungte chu YMA kalrem hla te, Signal Pawl hla te, Cheraw kan hla te, Venghnuai Kohhran tana a phuah hla te, Library a phuahna te, Rengram a phuahna te, lusun Khawharin an ngen avanga a phuah hla te leh hla chi dang dang a ni a. Hetiang kawh bik nei hla hi 35 lai a phuah a, chungte chu Thalaite Hlabuah hla 21 chu dah luh a ni tawh a, hla 14 chu la seng luh loh, a kutziak hla bu a hmuh theih a ni.                                                    

Heng a hla phuah chi hrang hrang te hi chipchiar tak chuan kan bih chiang hman lo vang a, kan thiamna in a tlin hek lo.

Hun hman that chungchang a phuahna hlaah chuan, hun inher liam zelin mi hrang hrang sang tam tak a liampui dan te, a lunglen thlak thute leh, a ngaihawm dan te thiam takin a han chham a. Thalaite lahin an ngaina a, rual taka an sa thup thup thinte mitthla ah a lo lang uar uar thei ani.                                                          

Nu hmangaihna hlutzia a phuahna, ‘Saisen teta ka lo pianin’ tih hlaah hian, mi dangin an hman ngai zen zen loh sawi chhuah dan mawi tak Rokunga hian a hmang a , a duhawm hle a ni. Mizo Hmeichhe Tangrual Pawl tana a phuah, “Chun nemi” tih hla hi a lar fu a.

Kan hla phuah thiam Rokunga rilru hi a fim a, a thuk a, miten a ruka sual rawng an bawlte chu a lo hmu kiau thei te hi mi pangngai bak a sawnna ropui tak a ni. ‘Zawl khawpui’ tiin a au na a, Mizoram pumpui a huam ti ila, a sual kher awm lo ve. Rokunga hla phuahna thinlung ril leh vision hi a mak a, chhuanawm tak a ni.

Ram leh hnam hla :

A tawp ber atan, Rokunga hian Mizote hi engtin nge a hmuh a, eng rilru puin nge a thlir a, an tan eng suangtuahna (vision) te nge a neih I lo zir leh teh ang.              

            Rokunga hian a hlaah Thalaite emaw, Mizo mipui zawng zawng huapin emaw a sawi dawnin, ‘Zofate’ tih hi a hmag tlem hle a, vawi hnih emaw chauh a hmang a, “Mizo” tih hi vawi thum emaw a hmang bawk a, “Zo ram” (tunlaia ziak ang hian a ziak zawm ve lo) tih erawh chu vawi 20 aia tlem lo a hmang tih kan hmu. “Zo ram” tia a hmanna tam tak chu “Mizote” sawi nan symbol anga a hman a ni.                         

            Tun hma deuha Mizo nula leh tlangval te kha chuan an kalna apiangah an hnam hre reng zelin hna an thawk a, khawvel Indopui vawi-1 naa France ram kal mi 2000 chuang lai te, Indopui vawi 2-naa tel te, sipaia tang leh sawrkar hnathawk hnam dang zinga chengte chuan Mizo hming an titha viau zel tih kan hria. ‘Tlang chhengchhe pui pui leh phaikuam thuk tak tak te pawh ruahpui van awm hnuaiah an paltlang zel a, rethei leh hah em emin hna an thawk a ni …” tih te pawh kan chhiar thin awm e.

            Kum 1995 April leh May thla khan khawchhak ram thenkhatah kan han zin ve a. Hongkong khawpui Hotel lian tak pakhatah kan thleng a, min lo dawngsawng tu te chu nula leh tlangval upa lo tak tak, kum 17-20 inkar hmel pu, smart taka inchei an ni a. Biak an nuamin an hawihhawm em em a, bill reng reng hi Computer-in an chhut zaih zaih mai a. Ka thianpa Vanlalchhawna nen chuan hmuhnawm kan ti em em mai a, “Aizawl ah chuan hetiang rual tam tak chu zu ruai bûk bûk leh, drug ngaia thle thle an ni hlawm si a,” kan ti dun a, kan rual awt em em mai. Kan Mongolian pui an ni a, engah nge Mizo thalaite hian kan tlin loh bik ang?                                       

            Tunah hian thalai tam tak chuan Mizoramah hna a vang kan ti a, kan tei huai huai a, lehkhathiam hna neilo lah kan thahnem ta fu. Mahse khawchhak lama kan Mizo hnahthlakpuite chuan Mizoramah hna a tam an ti a, an lo chhuk a, an thawk huai huai a. Silchar lam mi lahin hna a tam avang leh hlawh a tha an tih avangin an rawn tleh lut hum hum a. Dan phal loh thlengin an rawn tawlh lut tih kan hre theuh awm e. Chuvangin kan mi hmasate awmdan leh, Rokunga hla hmang hian inngaihtuah harh leh ila, intuaithar leh ila, I thangharh ang u.                                 

            Zikpuii Pa chuan, “Pu Rokunga rilruah chuan ‘Mizo’ tih hian Dikna, huaisenna, rinawmna, Tlawmngaihna a kawk nghal a, tlangval zawng zawng hi ‘Vana Pa’ an ni a, nula zawng zawng hi ‘Chhingpuii’ an ni vek mai,” a ti a.                         

            Awle, lo khaikhawm tawh ila. Thalaite thaw ipik em emna vaikian saka, theh vensaktu kan hla phuah thiamte zingah Rokunga hian a thawh hlawk ber a  tih theih a, nula leh tlangval te tan hla sak tur pe tam ber a ni a, lungrual taka Zoram timawitu angin Thalaite chu a hmu a, ram leh hnam hre renga hna thawk sauh sauh turin a duh a, thih thleng pawha rinawm tur leh, tlawmngaihna, huaisenna, dikna leh rinna vawng tha reng turin a ngen a, a tul phawt chuan hrehawm tam tak pawh tuar huam turin a fuih a, raltiang ram finna, thiamna, finna ram thlir zel turin a kawhhmuh a, Zofate rilru chu sâng takah a vawrh a, inlainat a, in unau tawn dial dial tur leh ram hmangaih turin Mizo hnahthlak zawng zawng a hla hian thui tak a hnehin a lang. Mizo nun ngainatna thinlung te, mawi tihna rilru te leh Mizo hnahthlak zawng zawng min ti Mizotu leh hnuk khawm a, phuar khawmtu hruhrual tha leh tangkai ber chu Rokunga hlate hi niin ka pawm a. Hetiang hla phuahtu ropui kan nei hi, “Zofate tana Pathian thilthlawnpek” a ni e, kan ti ani.

Rokunga Hla Phuah, Thalaite Hlabua La seng luh lohte :

(a)Kutziak Hla bu I-na (Mss I) atangin :

1.     Kan tap naupang a piang ta

2.    Lalpa Jehova chenna hmun thianghlim.

3.    Kumsul vei khua a thalin lung a leng e

4.    Lo haw rawh u, thiante u I zaikhawm ang

5.    Kumthar lawmawm chu  tunah kan tawng leh ta

6.    Van lal reng chu Lal ropui

7.    Aw ka ngai che Lalpa, ka lungngaih niah hian

8.   Aw Nang, kan Pathian duh tak ro in rel ang che

9.    Rai ka rah, thinlai riang ti hleihluanin

(b)                    Kutziak Hlabu II-na (Mss II) atangin :

10.          Zing eng mawi leh tlaitla eng hian

11. Ami hrai chawi tuai duh lengthen

12.I sakhming zaiah a chuang lo maw?

13. A thawm riin min rawn tiharhin

14.Zan tlai khaw thiang karah

15. Pi leh Pu chena kan lenna Regpui ram hi

16.I ram , I pianna ram

17. Ram khatah hnam ze tinreng an leng

18.          Boral hlauvin ka tap a

19.Kan vangkhua tlang lii liai

20.         Mim ang ka pianna leh

21.Lehkhabu tha mak tak a awm’

22.         Aw Isu, Chhandamtu, he khawvelah

23.          Buaina thlipui hrang velin

24.         Khawvel chhandam tura

25.          Pathianin khawvel a hmangaih em avangin